黃子華教你做逆市生還者

《生還者》大家就睇得多,無論係非洲版、澳洲版、定係蜜月狂奔版,都只3伙教大家係荒島、森林入面點生存,之但係大家有幾可去到呢d地方丫?呢個時勢,梗係對付逆市最實際啦!今期《東TOUCH》就專程搵黎咩事都一句「又如何?」既黃子華,教大家點樣做一個「逆市生還者」,各位讀者,學野啦!

 

方法一 大叫救命

打頭陣既方法係最容易、最直接,但係就最多人做唔到既,就係「大叫救命,搵人幫手」!

子華:「我可以話俾大家聽,有99.99%想自殺既人其實係唔想死,只係一時間接受唔到現實,如果係呢一刻有個人出黎扶一扶,加D安慰,咁就乜事都冇架啦!只不過依家D人死要面,唔肯認低威向人求救,講出黎就咩事都冇啦!」

的而且確,好多人窮到冇飯開,都唔肯去law綜援,就係怕俾人睇死!子華呼籲大家,遇到困難果陣,應該習慣「大叫救命,搵人幫手」,同朋友一齊面對,總好過自己鑽牛角尖。

 

方法二 面對現實

當想死果陣,朋友經已陪伴渡過,跟住要做既,就係「唔好自欺欺人,面對現實」!

子華:「大家覺得輸股票、做樓蟹好慘,其實只不過係將期望放得太高;之前試過好景,家陣只係冇錢吃喝玩樂者,就講到好似世界末日咁。其實人生一定有起有跌,唔會話一世都係高峰,跌左落地咪爬留起身囉!好似搵工咁,搵唔到部長咯,咪做侍應囉;又好似爭人錢還唔到咯,咪破產囉。」

表面上睇黎係好消極,不過諗深一層,呢個先係折衷既辦法,其實心理關口都好重要,唔通大家一世懷緬最光輝既日子唔向前行咩?

 

方法三 展望未來

如果方法二都解決唔到問題,不妨試下方法三:「忘記現在,展望未來」!

子華:「人生就好似一個旅程,其中一間酒店漏水,都只不過係一晚半晚既事,橫豎第二日都要走,根本唔重要。我好鍾意Tom Waits既〈A little rain doesn’t hurt no one〉,人生會經歷到好多小雨點,而呢D小雨點,其實唔會做成傷害。大家可能覺得呢一刻係世界末日,但係如果有人話『落雨其實好浪漫』,又或者有人遞把遮埋黎,就算係黑色暴雨又如何!」

 

方法四 K歌之王

大家係咪覺得以上三個方法都好深呢?其實仲有個簡單D既方法,就係「去K場做K歌之王」啦!

子華:「唱K係香港人文化,生日去唱K,失戀又唱K,除左工作,最多時間就係去唱K,總之唱K就成為左,生活既一部分,有咩比唱K更直接方便去抒發自己呀!」

就正正因為咁,子華部12月上映既新戲《男歌女唱》,就用唱K黎做主題啦。入面子華飾演一個自信心爆棚既人,最鍾意係唱K,三日不唱仲會死添。就係呢股動力,令佢改變左身邊大自信既阿梅,由「不能唱於人前」變到夠膽參加K歌大賽。

 

《男歌女唱》叫得做「K歌次王」,當然要唱得兩嘴,子華會在銀幕上大唱改編版的〈超人迪加〉及〈都是你的錯〉等。

 

 

à返回訪問主頁